Президенты гранты хицæуттæ
Æнæниздзинады сæрмагонд авналæнтимæ сывæллæттæ хъомыладон-ахуырадон фæзуатмæ куыд хъуамæ бахизой, уыцы фарста хуымæтæг нæу. Ахъуыды йыл кодтой ахуыргæнджытæ-психологтæ, сарæзтой хъæугæ проект. Рахастой йæ бæстæйы Президенты грант рамбулыны ерыстæм.
Сæ къухы бафтыд гранты хицау суæвын, ныр Дзæуджыхъæу æмæ районты сывæллæтты рæвдауæндæтты проект æххæст кæнынмæ бавнæлдтой. Æдæппæтæй сты 10 рæвдауæндоны, æххуыс исынц республикæйы Педагогты-психологты ассоциацийæ. Рæвдауæндæтты æххæст кæнынц фæлварæн проект, Цæгат Ирыстоны уый у паддзахад æмæ æхсæнадон организациты æмгуыстады дæнцæг. Æнæниздзинады сæрмагонд авналæнты уæвæг сывæллоны удварны-хæрзæгъдаудзинадыл куыд хуыздæр фæзынæн ис, ууыл бацархайдзысты.
Фæлварæн проект цы рæвдауæндæтты æххæст кæндзысты, уырдæм балхæдтой дидактикон æрмæг “Фребелы лæвæрттæ”, хорз цæттæгонд специалисттæ сæ куы спайда кæной, уæд сывæллæтты социалон æмæ коммуникативон арæхстдзинæдтæ, сæ ныхасы хъæд, базонын æмæ иртасыны, математикон арæхстдзинæдтæ фæфылдæр æмæ фæхуыздæр уыдзысты. Тедеты Маринæ у проекты координатор, комплекты æрмæджытæй дзæбæх пайда кæны, кусы Октябрыхъæуы 10-æм рæвдауæндоны. Ассоциацийæн Президенты грант рамбулыны уый фыццаг уæлахиз нæу. “Аргъæутты дунемæ аудиобалц” 2017 азы рамбылдта грант, æххæст æй кодтой 20 рæвдауæндоны. Проекты нысан уыдис ирон æвзаджы аудиочингуытæ уадзын, Гæбæраты Æхсарбег фæстæдæр рауагъта мобилон æфтуан “Ирон чиныг”. Проект бахастой 100 хуыздæр Президентон грантмæ. Проектты фæрцы æнæниздзинады сæрмагонд авналæнтимæ сывæллæттæн хъуамæ рæвдауæндæттæ суой инновацион фæлтæрддзинад парахатгæнæг методикон центртæ.